Bainis Bhréige Ros na Rún

Oct 22, 2018 | Nuacht

Bainis Bhréige Ros na Rún!

Save the Date: November 24th 2018

Beidh bainis bhréige Ros na Rún ar siúl in Óstán Chuan na Gaillimhe (Galway Bay Hotel) Dé Sathairn 24ú Samhain 5i.n.
Beidh na ticéid €35 an ceann agus beidh an t-airgead a bhailítear ag dul chuig na carthanachtaí Cancer Care West agus an Gavin Glynn Foundation, eagraíocht a thugann cúnamh do theaghlaigh ina bhfuil páiste le ailse air nó uirithi gur gá dóibh taisteal thar lear chun leigheas a fháil.

Beidh na ticéid ar díol 9.00r.n. 25ú Deireadh Fómhar, buail isteach go dtí Fáiltiú an Chuasnóg sa Spidéal. Uaireanta oscailte: Déardaoin 25ú Deireadh Fómhar 9-5i.n. agus Dé hAoine 26ú Deireadh Fómhar idir 9-2pm. Beidh líon beag ticéad sa Siopa i ngaráiste Texaco Mháirtín Bhán, Casla chomh maith.

Tá gach a bhfuil ag obair i Ros na Rún, idir aisteoirí agus criú, ag tabhairt cúnaimh chun oíche iontach a chuir os comhair 400 duine ar an 24ú Samhain. Is é Niall Mac Eachmharcaigh (John Joe i Ros na Rún) atá ag scríobh na scripte ach níl fhios fós cé atá ag pósadh ar an oíche. Tá cleachtadh maith aige ar an scríbhneoireacht agus is é a scríobh C.U. Burn, a craoladh ar TG4 beagnach scór bliain ó shin. Deir Niall go mbeidh an bhainis bhréige ar siúl go cinnte agus go mbeidh sé casta. Ní bheidh sé simplí ar aon nós, a dúirt sé agus meangadh gáire air!

Is í Brídín Ní Mhaoldomhnaigh, (Katy i Ros na Rún) atá ag eagrú an bhainis bhréige agus í ag baint an-sult go deo as! “Cé go mbíonn an oiread bainiseacha i Ros na Rún, tá muid ar fad ag tnúth go mór leis an gceann seo. Tá muid ag súil le é a dhéanamh os comhair lucht féachana, agus tá muid cinnte go mbeidh neart spraoi ag gach duine ar an lá. Tugann an ócáid seo seans dúinn ar fad a bheith ag obair le chéile. “Beidh searmanas sibhialta i dtosach leis na haisteoirí ag tógáil páirte sa mbainis mar dhráma! Ina dhiaidh seo, beidh fáiltiú dí, béile agus siamsaíocht leis an mbanna Oddity.” Ros na Rún Bainis Bhréige 24ú Samhain 2018 5i.n. san Galway Bay Hotel